مثل ما تدرون المدارس بلشت .. و الجد بلش .. بقالي سنه و اتخرج فعذروني لاني مو قاعده ادش على بوستاتكم
هالبوست مفروض ينزل اول يوم مدارس .. بس بين الواجبات و التحضير و النومه المعفوسه كنت تعبانه فما قدرت انزله
هذول الكتب كلهم تقريباً اللي عطونا اياهم
و هني بصوره اوضح
كلهم 21 كتاب مع كتاب محذوف يعني 20 كتاب
فوق هذا مغيرين ناظرتنا و منزله قوانين يديده
اهيا طبعاً اول سنه تصير ناظره
كانت وكيله بخالده بنت الاسود اسمها عادله او شي جذي
انا اللي سألتهم كلهم يكرهونها يقولون شرانيه و عسره
خل اقولكم شنو القوانين اللي حاطتهم علينا :
١- الحجاب ما ينفصخ كلش
قلنا لها الحق لانه خايفة على البنات الحارس يشوفهم او شي
بس بعدين قالت حتى بالصف ما ينفصخ انزين ليييش بروحه حر
٢- النفانيف بدون حزام ولا زراير ولا خيوط ولا شي ساده
٣- التراجي فتحه وحده و يكونون صغار يا ذهبي يا فضي
٤- عناقيص لي فوق ممنوع
٥- جوتي رياضة ( يكرم السامع ) ممنوع
لازم الكل يلبس فلات انزين ليييش شكو هذا بهذا
لا و لمن يكون علينا بدنيه لازم جوتي رياضة نييبه معانا بس ما يصير نلبسه
ليش كل هالعباله انزين ؟؟!
يعني شصار يعني اذا لبسنا جوتي رياضة
هذا غير بعد باجي القوانين اللي مو ذاكرتهم الحين
ايي و بعد يقولون انها مناصرة للمرأة و تكره شي اسمه ريال
لمن ايي لها ولي أمر تكلمه بنفسية و تطرده من مكتبها
و لما تكون وليه أمر يايتلها تكلمها بكل احترام
و هذا الكلام ناتج عن حادثة صارت
الحادثة كما روتها لي المصدر :
الموقع : المدرسة
الوقت : صباحاً
اتى الوالد العزيز لاحدى الطالبات الى مكتب الوكيله ( الناظره حالياً) و طلب منها ان يخرج ابنته
حيث انها اتصلت به من غرفة الاخصائية الاجتماعية تظراً لمرضها و ارهاقها الشديد
الوالد : لو سمحتي بنتي داقة .. تعبانه باخذها اوديها الطبيب ما عليج أمر
الناظرة : اسفة ما اطلع بنات .. من يخلص الدوام تقدر تاخذها
الوالد : بس بنتي تعبانه شلون اخليها
الناظرة : تشوفها تتدلع و تقول تعبانه و اهيا مافيها شي
الوالد : لو سمحتي نادي بنتي عشان اخذها
الناظرة : قلت لك ما راح تطلع لو سمحت تفضل برا عندي شغل وايد
خرج الوالد و هو في ثائر .. اتصل بوالدة الفتاة المريضة
الوالد : أم فلانه روحي اخذي بنتج حاولي تتفاهمين مع الوكيله (الناظره حالياً) ما تتفاهم كلش
اتجهت الوالدة الى المدرسة و طلبت من الوكيله (الناظرة حالياً) ان تحضر ابنتها لتسير بها الى الطبيب
الوالدة : لو سمحتي اختي يايه اخذ بنتي تعبانه
الناظرة : حاضر .. اي صف اهيا
الوالدة : الصف الفلاني
الناظرة : تفضلي قعدي على ما تيي
و خرجت الفتاة مع والدتها بسلام
.
.
.
الى الآن اللغز ساري فلا احد عرف سبب كرهها للرجال
علماً بأن الحادثة تكررت اكثر من مره باختلاف المواقف
تمنياتي لكم جميعاً بالتوفيق و النجاح
و دعواتكم اني اييب نسبه حلوه
الى اللقاء القريب
