مما قرأت
كتبت هالعنوان لان بتكلم عن أكثر من كتاب
قريتهم بالايام الماضية
الكتب كلهم من كتابة المهندس عبدالوهاب السيد
و يصنف من فئة الغموض و الخيال العلمي
بالنسبة لي و البعض يقدر يعتبرهم رعب
الكتب اللي قريتهم له :
الابعاد المجهولة الجزء الاول و هذا غلافه :
زيارات ليلية اتوقع هذا نفسه بس شكل الغلاف يختلف لاختلاف الطبعة :
١٧ :
و رسائل خوف الجزء الاول و الثاني ..
الصور اللي حصلهم مو واضحين او ما عجبوني
على العموم تم دمج الجزئين في كتاب واحد و تغير الغلاف على ما اعتقد
ببلش اتكلم عن كل قصة بس مو بالتفصيل و بشكل عام
لان مر وقت من خلصتهم و مو كل التفاصيل ببالي
الابعاد المجهولة و رسائل خوف نوعاً ما متصلين ببعض
لان الكاتب معتمد اسلوب شخصية تقص القصة
و الشخصية بالقصة اسمه سليمان
يتيم الابوين و يعيش مع جدته فاطمة
تصير له أحداث ما وراء الطبيعة
و يقصها بطريقة كتابه مذكرات
في الابعاد المجهولة تكون كلها سلسلة وحده
بس بطريقة مجزءة نوعا ما
و في رسائل خوف
الجزء الاول فيه قصتين
كلاهما لقراء قصة الابعاد المجهولة
و الجزء الثاني هم قصتين
الاولى لقارئ و الاخرى يرويها سليمان
اما زيارات ليلية و ١٧ الاثنين يعتبرون مجموعة قصصية
يصير فيها بعد احداث ما وراء الطبيعة
في زيارات ليلية ٥ قصص اذا ما خاب ظني
و ١٧ طبعا من الاسم نعرف ان فيها ١٧ قصة مختلفة
بصراحة كنت خايفة بالاول اقراهم ..
لان اللي يعرفني يدري اني اخاف من الرعب !
بس بالنسبة لي ما كانوا مخيفين لدرجة الرعب
اعتبرهم خيال علمي و غموض اكثر
لكن أكيد بهالنقطة يختلف كل منا فيها
بالنسبة لي هالكتب يستحقون القراءة
حبيتهم و تعايشت معاهم
و أكثر شيء حبيته فيهم خيال الكاتب
أكثر كاتب تعمقت في حروفه
و عجبني خياله الواسع و طريقة سرده
من كتاب الخيال العلمي
يمكن معظمكم ما يدري اني ما اقرا كتب بالعربي وايد
و بديت فيها متأخر حييل !
و أغلب القصص و الكتب اللي اقراها باللغة الاجنبية
فبالنسبة لي لما أقرا كاتب عربي يكتب بهالطريقة أتفاجأ
مو تقليل من شأن الكتاب
لكن ما شفت عندنا كتاب يكتبون بهالمجال وايد
و اذا تعرفون كتاب و قصص من هالنوع افيدوني
شغله ثانية حبيتها بالقصص ان في حقائق تكون موجوده في الواقع
و غريبة نوعاً ما تخلي الانسان يفكر أكثر
و ان كان بالسرد مافي شرح للنقطة او مثلا كلمة مثال على كلمة ( ميتافيزيقيا )
تلقون علامة و تحت الهامش شرحها او معلومة عن الحقيقة
هذه النقطة وايد حبيتها
لان غير ان قاعد استمتع بالقصة
بنفس الوقت اكتسبت معلومات جديدة
للتواصل مع الكاتب عبر Twitter :
@AAlsayed1973
.
.
ان شاء الله الكتب اللي خذيتها من معرض الكتاب
اكتب لكم رايي عنها اول بأول بطريقة افضل
مثل اسم الكاتب و الكتاب
رقم الطبعة
النبذة الموجوده في الخلف و رأيي فيه
و اذا قولولي اذا تبوني اكتب باللغة العربية
او اذا ما عندكم مشكلة بطريقتي هذه ( نص عامي نص لغة عربية )
xD
و سلامتكم
ليست هناك تعليقات:
إرسال تعليق