السلام عليكم ..
لأول مرة أكتب البوست و أنشره بسرعة
كل مرة انسى أو يغلبني الكسل على اني ارفع الصور و اعدلهم
المهم ..
يوم السبت رحت لمعرض الكتاب
ماشاء الله المعرض هالسنة كان أكثر تنظيم و ترتيب من السنة اللي طافت
ما افتريت بالمعرض وايد و ما قدرت أشوف كل الكتب و الدور
أول ما دشيت توجهت لقاعة ٦
و أخذت من دار نوفا :
المنصة - خالد عادل النصرالله
أفلاطونيا - أبرار الغصاب
كشمير - مشاري محمد العبيد
الحلم - بركات لافي العنزي
قبل الاحتضار بقليل - ابراهيم المحلاوي
ارث العيون - موضي العتيبي
و بعدها توجهت لدار بلاتينيوم لأخذ :
السر - نايف البشايرة
دانة - موضي الرباح
الليوان - عبدالله جواد صالح
و من دار ابن النفيس :
من لهيب الشوق - يوسف جاسم رمضان
طبعاً كان بخاطري ألقي نظرة على الكتب الثانية و أسأل أكثر
عن الكتب اللي لاقت نجاح و حتى الكتاب الجدد و الاصدارات الجديدة
لكن اكتفيت باللي خذتيهم لعدة أسباب منها :
١- ما بقى شيء على السفر و ما أبي اخلص اللي عندي اول
٢- دايماً اقدر اطلبهم بأي وقت
٣- بعض الكتب كنت متردده فيهم و ما أحب اخذ شي اكون فيه متردده
فقلت من الافضل اني اسمع رأي الناس اللي يقرون عنهم و بعدها أقرر
و هذه صورة حصيلتي من الكتب :
أحلى شيء بالنسبة لي لمن أروح معرض الكتاب اني التقي بكتاب أحبهم و أكن لهم تقدير ..
و أحب بعد ألتقي بالكتاب الجدد ..
و يوقعون لي على الاصدار ان كنت ماخذته ..
التقيت بوايد كتاب لكن مو الكل كنت ماخذة اصدارهم
و بعض الكتاب اللي حصلت على كتابهم ما كانوا موجودين للاسف
من الكتاب اللي خذيت كتبهم و كانوا متواجدين :
الكاتب : خالد النصرالله
الكاتب : مشاري محمد العبيد و كان يصادف حفل توقيعه
الكاتب : عبدالله جواد صالح و عرِف باسم شيصبان
الكاتب : يوسف جاسم رمضان
بعد ما خلصت من شراء الكتب و قررت اني أكتفي باللي أخذته قررنا ناخذ جوله نشوف القاعات الثانية
شغلهم بصراحة مرتب و متعوب عليه .. حبيت الترتيب الانشطة اكثر من السنة اللي فاتت
مريت صوب معرض جليس و سجلت معاهم
حبيت فكرتهم و كنت سامعة فيها من قبل و سجلت معاهم هالسنة
صج ما راح اكون قادرة احضر كل شي لان مثل ما ذكرت سفرتي عن قريب
بس اقدر استفيد دام اني موجودة .. و متى ما أكون بالكويت ان شاء الله
اتمنى الاقبال على القراءة و الاطلاع يزيد بدال الناس اللي تروح تشتري ذرة و بس
-.-
نصيحتي لكم :
لا تهجرون القراءة ..
حلو الواحد يكون عنده حب للاطلاع و ثقافته كبيرة حتى مصطلحاته تكثر
و حبيت اذكر المعرض مفتوح لين اول ديسمبر ان شاء الله
و ان شاء الله كل ما أخلص كتاب بكتب رأيي عنه لكم :*
للي راح معرض الكتاب : شنو الكتب اللي شريتوها ؟
و اللي ناوي يروح : شنو الكتب اللي ناوين تاخذونها ؟
تحبون الكاتب يوقع لكم او يهدي كلماته لكم على الكتاب او لا ؟!
ليست هناك تعليقات:
إرسال تعليق